Hamara dil sawere ka sunehra jam ho jaye

ہمارا دل سویرے کا سنہرا جام ہوجائے

ہمارا دل سویرے کا سنہرا جام ہوجائے

چراغوں کی طرح آنکھیں جلیں جب شام ہوجائے

کبھی تو آسماں سے چاند اُترے جام ہوجائے

تمہارے نام کی اک خوبصورت شام ہوجائے

عجب حالات تھے یوں دل کا سودا ہوگیا آخر

محبت کی حویلی جس طرح نیلام ہوجائے

سمندر کے سفر میں اس طرح آواز دے ہم کو

ہوائیں  تیز ہوں اور کشتیوں میں شام ہوجائے

مجھے معلوم ہے اس کا ٹھکانہ پھر کہاں ہوگا

پرندہ آسماں چھونے میں جب ناکام ہوجائے

اُجالے اپنی یادوں کے ہمارے ساتھ رہنے دو

نہ جانے کس گلی میں زندگی  کی شام ہوجائے

بشیرؔبدر

Tum abhi shehr mein kya naye aaye ho

تم ابھی شہر میں کیا نئے آئے ہو

تم ابھی شہر میں کیا نئے آئے ہو

رک گئے راہ میں حادثہ دیکھ کر

تم جنہیں پھول سمجھے ہو آنکھیں نہ ہوں

پاؤں رکھنا زمیں پر ذرا دیکھ کر

پھر دیئے رکھ گئیں تیری پرچھائیاں

آج دروازہ دل کا کھلا دیکھ  کر

اس کی آنکھوں کا ساون برسنے لگا

بادلوں میں پرندہ گھرا دیکھ کر

شام گہری ہوئی اور گھر دور ہے

پھول سوجائیں گے راستہ دیکھ کر

پھول سی انگلیاں کنگھیاں بن گئیں

الجھے بالوں میں ماتھا ڈھکا دیکھ کر

                بشیرؔبدر

Fun agar rooh o dil ki reyazat na ho

فن اگر روح و دل کی ریاضت نہ ہو

فن اگر روح و دل کی ریاضت نہ ہو

ایسی مسجد ہے جس میں عبادت نہ ہو

تیری آنکھوں میں ایسا سنور جاؤں میں

عمر بھر آئینوں کی ضرورت نہ  ہو

کس کو نیلام کرتے ہو بازار میں

یہ کسی گھر کے مندر کی مورت نہ ہو

دلنوازی کے فن جاننا   چاہیئے

حسن چاہے بہت خوب صورت نہ ہو

دن تو   نکلا خریدا   ہوا   آدمی

اے خدا رات بھی سب کی عورت نہ ہو

چھپروں پر دیئے رکھ گئی ہے ہوا

تاکہ پھر روشنی کی شکایت نہ ہو

                بشیرؔبدر

Ghar se nikle agar hum behek jayen ge

گھر سے نکلے اگر ہم بہک جائیں گے

گھر سے نکلے اگر ہم بہک جائیں گے

وہ گلابی کٹورے چھلک جائیں گے

ہم نے الفاظ کو آئینہ کردیا

چھُپنے والے غزل میں چمک جائیں گے

دشمنی کا سفر اک قدم دو قدم

تم بھی تھک جاؤگے ہم بھی تھک جائیں گے

رفتہ رفتہ ہر اک زخم بھر جائے گا

سب نشانات پھولوں سے ڈھک جائیں گے

نام پانی پہ لکھنے سے کیا فائدہ

لکھتے لکھتے ترے ہاتھ تھک جائیں گے

یہ پرندے بھی کھیتوں کے مزدور ہیں

لوٹ کے اپنے گھر شام تک جائیں گے

دن میں پریوں کی کوئی کہانی نہ سُن

جنگلوں میں مسافر بھٹک جائیں گے

             بشیرؔبدر

Abhi is taraf na nigaah kar main ghazal ki palken sanwaar loon

ابھی اس طرف نہ نگاہ کر میں غزل کی پلکیں سنوار لوں

ابھی اس طرف نہ نگاہ کر میں غزل کی پلکیں سنوار لوں

مرا لفظ لفظ ہو آئینہ تجھے آئینے میں اُتار  لوں

میں تمام دن کا تھکا ہوا تو تمام شب کا جگا ہوا

ذرا ٹھہر جا اسی موڑ پر تیرے ساتھ شام گزار لوں

اگر آسماں کی نمائشوں  میں مجھے بھی اذنِ قیام ہو

تو میں موتیوں کی دکان سے تری بالیاں ترے ہار لوں

کہیں اور بانٹ دے شہر میں کہیں اور بخش دےعزتیں

میرے پاس ہے مرا آئینہ میں کبھی نہ گرد و غبار لوں

کئی اجنبی تری راہ میں مرے پاس سے یوں گزر گئے

جنہیں دیکھ کر یہ تڑپ ہوئی ترا نام لے کے پکار لوں

بشیرؔبدر

Woh chandni ka badan khushbuon ka saya hai

وہ چاندنی کا بدن خوشبوؤں کا سایہ ہے

وہ چاندنی کا بدن خوشبوؤں کا سایہ ہے

بہت عزیز ہمیں ہے مگر پرایا ہے

اُتر بھی آؤ کبھی آسماں کے زینے سے

تمہیں خدا نے ہمارے لئے بنایا ہے

کہاں سے آئی یہ خوشبو، یہ گھر کی خوشبو ہے

اس اجنبی  کے اندھیرے میں کون آیا ہے

مہک رہی ہے زمیں چاندنی کے پھولوں سے

خدا کسی کی محبت پہ مسکرایا ہے

اُسے کسی کی محبت کا اعتبار نہیں

اسے زمانے نے شاید بہت ستایا ہے

تمام عمر مرا دم اسی دُھوئیں میں گھٹا

وہ اک چراغ تھا میں نے اسے بجھایا ہے

                            بشیرؔ بدر

Dua karo ke ye poda sada hara hi lage

دعا کرو کہ یہ پودا سدا ہرا ہی  لگے

دعا کرو کہ یہ پودا سدا ہرا ہی لگے

اداسیوں میں بھی چہرہ کھلا کھلا ہی لگے

عجیب شخص ہے ناراض ہوکے ہنستا ہے

میں چاہتا ہوں خفا ہو تو وہ خفا ہی لگے

وہ زعفرانی پلوور اسی کا حصہ ہے

کوئی جو دوسرا پہنے تو دوسرا ہی لگے

نہیں ہے میرے مقدر میں روشنی نہ سہی

یہ کھڑکی کھولو ذرا صبح کی ہوا ہی لگے

                      بشیرؔبدر

Har bat mein mehke hue jazbaat ki khushboo

ہر بات میں مہکے ہوئے جذبات کی خوشبو

ہر بات میں مہکے ہوئے جذبات کی خوشبو

یاد  آئی بہت پہلی ملاقات کی خوشبو

چھپ چھپ کے نئی صبح کا منہ چوم رہی ہے

ان ریشمی زلفوں میں بسی رات کی خوشبو

موسم بھی حسینوں کی ادا سیکھ گئے ہیں

بادل ہیں چھپائے ہوئے برسات کی خوشبو

گھر کتنے ہی چھوٹے ہوں گھنے پیڑ ملیں گے

شہروں سے الگ ہوتی ہے قصبات کی خوشبو

ہونٹوں پہ ابھی پھول کی پتی کی مہک ہے

سانسوں میں رچی ہے تری سوغات کی خوشبو

                          بشیرؔبدر

Kis ne mujh ko sada di bata kaun hai

کس نے مجھ کو صدا دی بتا کون ہے

کس نے مجھ کو صدا دی بتا کون ہے

اے ہوا  تیرے گھر میں چھپا کون ہے

بارشوں میں کسی پیڑ کو دیکھنا

شال اوڑھے ہوئے بھیگتا کون ہے

خوشبوؤں میں نہائی ہوئی شاخ پر

پھول سامسکراتا ہوا کون ہے

میں یہاں دھوپ میں تپ رہا ہوں مگر

وہ پسینے میں ڈوبا ہوا کون ہے

دل کو پتھر ہوئے اک زمانہ ہوا

اس مکاں میں مگر بولتا کون ہے

آسمانوں کو ہم نے بتایا نہیں

ڈوبتی شام میں ڈوبتا کون ہے

تم بھی مجبور ہو ہم بھی مجبور ہیں

بے وفا کون ہے با وفا کون ہے

              بشیر ؔبدر

Muskurati hui dhanak hai wahi

مسکراتی ہوئی دھنک ہے وہی

مسکراتی ہوئی دھنک ہے وہی

اس بدن میں چمک دمک ہے وہی

پھول کُملا گئے   اجالوں کے

سانولی شام میں نمک ہے وہی

اب بھی چہرہ چراغ لگتا ہے

بجھ گیا ہے مگر چمک ہے وہی

وہ سراپا دیئے کی لو جیسا

میں ہوا ہوں  ادھر لپک ہے وہی

کوئی شیشہ ضرور ٹوٹا ہے

گنگناتی ہوئی کھنک ہے وہی

پیار کس کا مِلا ہے مٹی میں

اس چنبیلی تلے مہک ہے وہی

                   بشیرؔ بدر

Pathar ke jigar walo gham mein woh rawani hai

پتھر کے جگر والو غم میں وہ روانی ہے

پتھر کے جگر والو غم میں وہ روانی ہے

خود راہ بنا لے گا بہتا ہوا پانی ہے

پھولوں میں غزل رکھنا یہ رات کی رانی ہے

اس میں تری زلفوں کی بے ربط کہانی ہے

اک ذہنِ پریشان میں  وہ پھول سا چہرہ ہے

پتھر کی حفاظت میں شیشے کی جوانی ہے

کیوں چاندنی راتوں میں دریا پہ نہاتے ہو

سوئے ہوئے پانی میں کیا آگ لگانی ہے

اس حوصلۂ دل پر ہم نے بھی کفن پہنا

ہنس کر کوئی پوچھے گا کیا جان گنوانی ہے

رونے کا اثر دل پر رہ رہ کے بدلتا ہے

آنسو کبھی شیشہ ہے آنسو بھی پانی ہے

یہ شبنمی لہجہ ہے  آہستہ غزل پڑھنا

تتلی کی کہانی ہے پھولوں کی زبانی ہے

                      بؔشیر بدر

Sar pe saya sa dast e dua yad hai

سر پہ سایہ سا   دستِ دُعا یاد ہے

سر پہ سایہ سا  دست، دُعا یاد ہے

اپنے آنگن میں اک پیڑ تھا یاد ہے

جس میں اپنی پرندوں سے تشبیہ تھی

تم کو اسکول کی وہ دُعا یاد ہے

ایسا لگتا ہے ہر امتحاں کے لئے

زندگی کو ہمارا پتہ یاد ہے

میکدے میں اذاں سُن کے رویا بہت

اس شرابی کو دل سے خدا یاد ہے

میں پرانی حویلی کا پردہ مجھے

کچھ کہا یاد ہے کچھ سنا یاد ہے

            بؔشیر بدر

Doosron ko hamari sazain na de

دوسروں کو ہماری سزائیں نہ دے

دوسروں کو ہماری سزائیں نہ دے

چاندنی رات کو بددعائیں نہ دے

پھول سے عاشقی کا ہنر سیکھ لے

تتلیاں خود رکیں گی صدائیں نہ دے

سب گناہوں کا اقرار کرنے لگیں

اس قدر خوب صورت سزائیں نہ دے

میں درختوں کی صف کا بھکاری نہیں

بے وفا موسموں کی قبائیں نہ  دے

موتیوں کو چھپا  سیپیوں کی طرح

بے وفاؤں کو اپنی وفائیں نہ دے

میں بکھر جاؤں گا آنسوؤں کی طرح

اس قدر پیار سے بددعائیں نہ دے

                بشیؔر بدر

Khuda ham ko aisi khudai na de

خُدا ہم کو  ایسی خدائی نہ دے

خُدا ہم کو ایسی خدائی نہ دے

کہ اپنے سوا کچھ دکھائی نہ دے

خطاوار سمجھے کی دنیا تجھے

اب اتنی  ذیادہ صفائی نہ دے

ہنسو آج اتنا کہ اس شور میں

صدا سسکیوں کی سنائی نہ دے

غلامی کو برکت سمجھنے لگیں

اسیروں کو ایسی رہائی نہ دے

ابھی تو بدن میں لہو ہے بہت

قلم چھین کر روشنائی نہ دے

مجھے اپنی چادر میں یوں ڈھانپ لے

زمیں آسماں کچھ دکھائی نہ دے

خدا ایسے احساس کا نام ہے

رہے سامنے اور دکھائی نہ دے

                   بشیرؔ بدر

Kabhi yun bhi aa meri aankh mein ke meri nazar ko khabar na ho

کبھی یوں بھی آ میری آنکھ میں کہ مری نظر کو خبر نہ ہو

کبھی یوں بھی آ میری آنکھ میں کہ مری  نظر کو خبر نہ ہو

مجھے ایک رات نواز دے مگر اس کے بعدسحر نہ ہو

وہ بڑا رحیم و کریم ہے مجھے یہ صفت بھی عطا کرے

تجھے بھولنے کی دعا کروں تو مری دعا میں اثر نہ ہو

مرے بازوؤں میں تھکی تھکی ابھی محوِ خواب ہے چاندنی

نہ اٹھے ستاروں کی پالکی ابھی آہٹوں کا گزر نہ ہو

یہ  غزل کہ جیسے ہرن کی آنکھ میں پچھلی رات کی چاندنی

نہ بجھے خرابے کی روشنی کبھی بے چراغ یہ گھر نہ ہو

کبھی دن کی دھوپ میں جھوم کے کبھی شب کے پھول کو چوم کے

یوں ہی ساتھ ساتھ چلیں سدا کبھی ختم اپنا سفر نہ ہو

                         بشیرؔبدر

Is tarah sath nibhna hai dushwaar sa

اس طرح ساتھ نبھنا ہے دشوار سا

اس طرح ساتھ نبھنا ہے دشوار سا

تو بھی تلوار سا ، میں بھی تلوار سا

اپنا رنگِ غزل، اس کے رخسار سا

دل چمکنے   لگا  ہے   رُخِ   یار سا

اب ہے ٹوٹا سا دل خود سے بیزار سا

اس حویلی میں لگتا ہے دربار سا

خوب صورت سی پیروں میں زنجیر ہو

گھر میں بیٹھا رہوں میں گرفتار سا

میں فرشتوں کی صحبت کے لائق نہیں

ہم سفر کوئی   ہوتا   گنہگار   سا

گڑیا ، گڈے کو بیچا ، خریدا گیا

گھر سجایا  گیا   رات  بازار   سا

شام تک کتنے ہاتھوں سے گزروں گا میں
چائے خانے میں اُردو کے اخبار سا
بات کیا ہے کہ مشہور لوگوں کے گھر
موت کا سوگ ہوتا ہے تیوہار سا
زینہ زینہ اُترتا    ہوا   آئینہ
اس  کا  لہجہ   انوکھا  کھنک  دار  سا
             بشیر ؔبدر

Is tarah dunya mili shikwa gila jata raha

اس طرح دنیا ملی شکوہ گلہ جاتا رہا

اس طرح دنیا ملی شکوہ گلہ جاتا رہا

میں سمجھتا تھا مرا تیرے سوا کوئی نہیں

خط نہیں ہوں جس پہ تم راہوں کی تفصیلیں لکھو

اس کے گھر جاؤں گا میں جس کا پتہ کوئی نہیں

ایسا لگتا ہے کہ تو مجھ سے جدا ہو جاتے گا

تیرے میرے درمیان اب فاصلہ کوئی نہیں

اب تمہیں سچی محبت کا یقیں آجائے گا

اس بڑے شہرِ وفا میں بے وفا کوئی نہیں

میں  پیمبر تو نہیں لیکن مجھے احساس ہے

ان بُرے لوگوں میں بھی مجھ سا بُرا کوئی نہیں

                       بشیرؔ بدر

Honton pe mohabbat ke fasane nahin aate

ہونٹوں پہ محبت کے فسانے نہیں آتے

ہونٹوں پہ محبت کے فسانے نہیں آتے

ساحل پہ سمندر کے خزانے نہیں آتے

پلکیں بھی چمک اُٹھتی ہیں سونے میں ہماری

آنکھوں کو ابھی خواب چھپانے نہیں آتے

دل اُجڑے ہوئے ایک سرائے کی  طرح ہے

اب لوگ یہاں رات جگانے نہیں آتے

یارو نئے موسم نے یہ احسان کئے ہیں

اب یاد   مجھے   درد پُرانے نہیں آتے

اُڑنے دو پرندوں کو ابھی شوخ ہوا میں

پھر لوٹ کے بچپن کے زمانے نہیں آتے

اس شہر کے بادل تری زلفوں کی طرح ہیں

یہ آگ لگاتے ہیں بجھانے نہیں آتے

احباب بھی غیروں کی ادا سیکھ گئے ہیں

آتے ہیں مگر دل کو دُکھانے نہیں آتے

                         بشیر ؔبدر

So khuloos baton mein sab karam khayalon mein

سو خلوص باتوں میں سب کرم خیالوں میں

سو خلوص باتوں میں سب کرم خیالوں میں

بس ذرا وفا کم ہے تیرے شہر والوں میں

پہلی بار نظروں نے چاند بولتے دیکھا

ہم جواب کیا دیتے کھو گئے سوالوں میں

رات تیری یادوں نے دل کو اس طرح چھیڑا

جیسے کوئی چٹکی لے نرم نرم گالوں میں

یُوں کسی کی آنکھوں میں صبح تک ابھی تھے ہم

جس طرح رہے شبنم پُھول کے پیالوں میں

میری آنکھ کے تارے اب نہ دیکھ پاؤ گے

رات کے مسافر تھے کھو گئے اُجالوں میں

                          بشیر ؔ بدر

Chamak rahi hai paron mein udan ki khushboo

چمک رہی ہے پروں میں اُڑان کی خوشبو

چمک رہی ہے پروں میں اُڑان کی خوشبو

بُلا رہی ہے بہت آسمان کی خوشبو

بھٹک رہی ہے پرانی دلائیاں اوڑھے

حویلیوں میں مرے خاندان کی خوشبو

سُنا ہے کوئی کہانی ہمیں سُلاتی تھی

دعاؤں جیسی بڑے پاندان کی خوشبو

دبا تھا پھول کوئی میز پوش کے نیچے

گرج رہی تھی بہت پیچواں کی خوشبو

عجب وقار تھا سُوکھے سنہرے بالوں میں

اداسیوں کی چمک، زرد  لان کی خوشبو

وہ عطر دان سا لہجہ مرے بزرگوں کا

زَچی بسی ہوئی اُردو زبان کی خوشبو

خُدا کا شکر ہے میرے جوان بیٹے کے

بدن سے آنے لگی زعفران کی خوشبو

عمارتوں کی بلندی پہ کوئی مو سم کیا

کہاں سے آگئی کچے مکان کی خوشبو

گلوں پہ  لکھتی ہوئی  لاَ اِلہ اِلاّ اللہ

پہاڑیوں سے اترتی اذان  کی خوشبو

                   بشیرؔبدر