Hum ko Europe mein bhi

ہم کو یورپ میں کراچی کی فضا یاد رہی

ہم کو یورپ میں کراچی کی فضا یاد رہی

وہی گرمی ،  وہی مرطوب ہوا  یاد  رہی

ایک ہنگامہ ہے لندن مگر اس میں بھی ہمیں

تیرے  ہی دل کے دھڑکنے کی صدا یاد رہی

شامِ پیرس نے بہت رنگ   دکھائے   ہم کو

اور   وہی  سادگئ  رنگ ِ   حنا   یاد  رہی

مہرباں غمزہ کناں،  مہ  وشانِ  روما

حیرتی ہیں کہ ہمیں کس کی وفا یاد رہی

کیا وہ سیلاب تھا اس قوس و قزح کا جس میں

ایک اپنی ہی کِرن سب سے جُدا یاد رہی

سحرِ  برلن سے ہی پوچھو تو گواہی مِل  جائے

وہی  سرمستئ لاہور  سدا یاد رہی

جھیل لیمان کا  منظر ، وہ سرورِ ابدی

کوئی تو  بات ہمیں اس سے سوا یاد رہی

ایمسٹردم  میں جو طوفانِ گُل و لالہ مِلا

اس میں بھی زرد چنبیلی   کی ہوا  یاد رہی

ارضِ  ڈینیوب کہ نغموں کا   سمندر ہے وہاں

لبِ   مہران کی پُرسوز  نِدا  یاد رہی

اس  طلسمات   سے آنا کوئی  آسان  نہ  تھا

وہ تو کہیئے  کہ ہمیں لغزشِ پا  یاد  رہی

                          جمیل الدین عالیؔ

Sirre haqeeqat hath na aaya

سرحقیقت   ہاتھ  نہ آیا   بھُول  گئے   افسانے  بھی

سرِحقیقت   ہاتھ  نہ آیا   بھُول   گئے   افسانے  بھی

پہلے ہی کیا کچھ تھے عالیؔ  اب ٹھہرے فرزانے بھی

دیکھیئے دل کی آنچ پہ کب تک گرمئِ  محفل جائے گی

راکھ ہوئے سب باہر والے شمعیں بھی پروانے بھی

اتنے برس کی شدّتِ عشق اور شہرتِ شعر کا یہ انجام

آپ ہمارے پاس سے گزرے اور ہمیں پہچانے بھی

ہائے یہ    اندر کی تنہائی جس  کے لئے ہم چھوڑ آئے

تیرے شہر اور تیرے قریےاور اپنے  ویرانے بھی

کب سے ہم انصاف کے پیاسے جلتے ہیں اور کہتے ہیں

کوئی نہ کوئی صدی آئے گی اپنی آگ بجھانے بھی

آخر ان سوکھے ہونٹوں پر مستیِ ذات  اُبھر آئی

اب اس میں سب جل جائیں گے ساغر بھی میخانے بھی

منتظرِ اظہار  پڑے   ہیں   عالؔی  کتنی مدت   سے

کتنے دُکھ جانے   پہچانے   کتنے دکھ   انجانے  بھی

                            جمیل الدین عالی