Main ne aghaz se anjam e safar jana hai

میں نے آغاز سے انجامِ سفر جانا ہے

میں نے آغاز سے انجامِ سفر جانا ہے

سب کو دو چار قدم چل کے ٹھہر جانا ہے

غم وہ صحرائے تمنّا کہ بگولے کی طرح

جس کو منزل نہ ملی اس کو بکھر جانا ہے

تیری نظروں میں مرے درد کی قیمت کیا تھی

میرے دامن نے تو آنسو کو گہر جانا ہے

اب کے بچھڑے تو نہ پہچان سکیں گے چہرے

میری چاہت ترے پندار کو  مر جانا ہے

جانے والے کو نہ روکو کہ بھرم رہ جائے

تم پکارو بھی تو کب اس کو ٹھہر جانا ہے

تیز سورج میں چلے آتے ہیں میری جانب

دوستوں نے مجھے  صحرا کا شجر جانا ہے

زندگی کو بھی ترے در سے بھکاری کی طرح

ایک پل کے لیے رُکنا ہے گزر جانا ہے

اپنی افسردہ مزاجی کا برا ہو کہ فراؔز

واقعہ کوئی بھی ہو آنکھ کو بھر جانا ہے

                        احمد فراؔز

Tujh se bichar ke hum bhi muqaddar ke ho gaye

تجھ سے بچھڑ کے ہم بھی مقدر کے ہوگئے

تجھ سے بچھڑ کے ہم بھی مقدر کے ہوگئے

پھر جو بھی در ملا ہے اسی در کے ہوگئے

پھر یوں ہوا کہ غیر کو دل سے لگا لیا

اندر وہ نفرتیں تھیں کہ باہر کے ہوگئے

کیا لوگ تھے کہ جان سے بڑھ کر عزیز تھے

اب دل سے محو نام بھی اکثر کے ہوگئے

اے یادِ یار تجھ سے کریں کیا شکایتیں

اے درد ِ ہجر ہم بھی تو پتھر کے ہوگئے

سمجھا رہے تھے مجھ کو سبھی ناصحانِ شہر

پھر رفتہ رفتہ خود اسی کافر کے ہوگئے

اب کے نہ انتظار کریں چارہ گر کہ ہم

اب کے گئے تو کوئے ستم گر کے ہوگئے

روتے ہو اک جزیرۂ جاں کو فراؔز تم

دیکھو تو کتنے شہر سمندر کے ہوگئے

                   احمد فراؔز

Abr e bahar ab ke bhi barsa parey parey

ابرِبہار  اب کے بھی برسا پرے پرے

ابرِ بہار اب کے بھی برسا پرے پرے

گلشن اُجاڑ اُجاڑ ہیں جنگل ہرے ہرے

جانے یہ تشنگی ہے ہوس ہے کہ خودکشی

جلتے ہیں شام ہی سے جو ساغر بھرے بھرے

ہے دل کی موت عہدِ وفا کی شکستگی

پھر بھی جو کوئی ترکِ محبت کرے کرے

اب اپنا دل بھی شہرِ خموشاں سے کم نہیں

سُن ہوگئے ہیں کان صدا پر دھرے دھرے

رہتے ہیں اہلِ شہر کے سائے سے دور دور

ہم آہوانِ دشت کی صورت ڈرے ڈرے

گل بن کے پھوٹتا ہے لہو شاخسار سے

زخم ِ رگِ بہار ہیں پتے ہرے ہرے

زندہ دلانِ شہر کو کیا ہوگیا  فراؔز

آنکھیں بجھی بجھی ہیں تو چہرے مرے مرے

                         احمد فراؔز

Jism shula hai jabhi jama e sada pehna

جسم شعلہ ہے جبھی جامۂ سادہ پہنا

جسم شعلہ ہے جبھی جامۂ سادہ پہنا

میرے سورج نے بھی بادل کا لبادہ پہنا

سلوٹیں ہیں میرے چہرے پہ حیرت کیوں ہے

زندگی نے مجھے کچھ تم سے زیادہ پہنا

خواہشیں یوں ہی برہنہ ہوں تو جل بجھتی ہیں

اپنی چاہت کو کبھی کوئی ارادہ پہنا

یار خوش ہیں کہ انھیں جامۂ احرام ملا

لوگ ہنستے ہیں کہ قامت سے زیادہ پہنا

یارِ پیمان شکن آئے اگر اب تو اسے

کوئی زنجیرِ وفا اے شبِ وعدہ پہنا

غیرتِ عشق تو مانع تھی مگر میں نے فؔراز

دوست کا طوق سرِ محفلِ اعدا پہنا

                     احمد فؔراز

﷽Barson ke baad dekha ek shakhs dilruba sa

برسوں کے بعد دیکھا اک شخص دِلربا  سا

برسوں کے بعد دیکھا اک شخص دِلربا سا

اب ذہن میں نہیں ہے پر نام تھا بھلا سا

ابرُو کھچے کھچے سے آنکھیں جھکی جھکی سی

باتیں رُکی رُکی سی  لہجہ تھکا تھکا سا

الفاظ تھے کہ جگنو آواز کے سفر میں

بن بائے جنگلوں میں جس طرح راستا سا

خوابوں میں خواب اسکے یادوں میں یاد اسکی

نیندوں میں گھُل گیا ہو جیسے کہ رتجگا سا

پہلے بھی لوگ آئے کتنے ہی زندگی میں

وہ ہر طرح سے لیکن اوروں  سے تھا جدا سا

اگلی محبتوں نے وہ نامرادیاں دیں !

تازہ رفاقتوں سے دل تھا ڈرا ڈرا سا

کچھ یہ کہ مدتوں سے ہم بھی نہیں تھے روئے

کچھ زہر میں بجھا تھا احباب کا دلاسا

پھر یوں ہوا کہ ساون آنکھوں میں آبسے تھے

پھر یوں ہوا کہ جیسے دل بھی تھا آبلہ سا

اب سچ کہیں تو یارو ہم کو خبر نہیں تھی

بن جائے گا قیامت اک واقعہ ذرا سا

تیور تھے بے رُخی کے انداز دوستی کے

وہ اجنبی تھا لیکن لگتا تھا آشنا سا

ہم دشت تھے کہ دریا ہم زہر تھے کہ امرت

ناحق تھا زعم ہم کو جب وہ نہیں تھا پیاسا

ہم نے بھی اس کو دیکھا کل شام اتفاقاً

اپنا بھی حال ہے اب لوگو فرؔاز کا سا

                      احمد فؔراز

Udaas aur zeyada kahin na hojain

اداس اور زیادہ کہیں نہ ہو جا ئیں

اداس اور زیادہ کہیں نہ ہو جا ئیں

فراؔز انجمنِ دوست سے چلو جائیں

نہ اجنبی، نہ مسافر، نہ شہر والے ہیں

کوئی پکارو کہ ہم بھی کسی کے ہوجائیں

جو صدمے ہم پہ گزرنے ہیں وہ تو گزریں گے

مگر یہ آپ کو غم کیوں ہے آپ تو جائیں

اُلجھتے ہیں ترے سودائیوں سے اہلِ خرد

یہ سادہ لوح بھی پاگل کہیں نہ ہوجائیں

زمانہ اپنی پریشانیوں میں کھویا ہے

چلو کہ منزلِ جاناں کو دوستو جائیں

شبِ فراق تو کٹتی نظر نہیں آتی

خیالِ یار میں آؤ فراؔز سوجائیں

              احمد فرازؔ

Inkar na iqrar bari dair se chup hain

انکار  نہ اقرار بڑی دیر سے چُپ ہیں

انکار نہ اقرار بڑی دیر سے چُپ ہیں

کیا بات ہے سرکار بڑی دیر سے چُپ ہیں

آسان نہ کردی ہو کہیں موت نے مشکل

روتے ہوئے بیمار بڑی دیر سے چُپ ہیں

اب کوئی اشارہ ہے نہ پیغام نہ آہٹ

بام و در و دیوار بڑی دیر سے چُپ ہیں

ساقی یہ خموشی بھی تو کچھ غور طلب ہے

ساقی ترے میخوار بڑی دیر سے چُپ ہیں

یہ برق نشیمن پہ گری تھی کہ قفس پر

مرغانِ گرفتار بڑی دیر سے چُپ ہیں

اِس شہر میں ہر جنس بنی یوسفِ کنعاں

بازار کے بازار بڑی دیر سے چُپ ہیں

                     احمد فراؔز

Sakoot e shab hi sitam ho to ham uthain bhi

سکوتِ شب ہی ستم ہو تو ہم اُٹھائیں بھی

سکوتِ شب ہی ستم ہو تو ہم اُٹھائیں بھی

وہ یاد آئے تو چلنے لگیں ہوائیں بھی

یہ شہر میرے لیے اجنبی نہ تھا لیکن

تمہارے ساتھ بدلتی گئیں فضائیں بھی

جو بزمِ دوست سے اُٹھ کر چلے بزعمِ تمام

کوئی پکارے تو شاید وہ لوٹ آئیں بھی

دلوں کا قرب کہیں فاصلوں سے مٹتا ہے

یہ خود فریب  ترا شہر چھوڑ جائیں بھی

ہم ایسے لوگ جو آشوب ِ دہر میں بھی ہیں خوش

عجب نہیں ہے اگر تجھ کو بھول جائیں بھی

سحر گزیدہ ستاروں کا نور بُجھنے لگا

فراؔز اُٹھّو اب اُس کی گلی سے جائیں بھی

                                احمد فراؔز

Har aik dil ko talab har nazar sawali hai

ہر ایک دل کو طلب ہر نظر سوالی ہے

ہر ایک دل کو طلب ہر نظر سوالی ہے

کہ شہرِ حُسن میں جلوؤں کی قحط سالی ہے

کہاں ہے دوست کہ آشوبِ دہر سے میں نے

ترے خیال کی آسودگی بچالی ہے

بتا رہا ہے فضا کا اٹوٹ سناٹا

افق سے پھر کوئی آندھی اُترنے والی ہے

لرز رہے ہیں شگوفے چمن میں کھلتے ہوئے

حنائے دستِ صبا میں لہو کی لالی ہے

پیئو شراب کہ ناصح نے زہر بھی دے کر

ہماری جُرأتِ رندانہ آزمالی ہے

پھر آھ دانۂ گندم کے سلسلے میں فؔراز

کسی خدا  نے مری خلد بیچ ڈالی ہے

                      احمد فؔراز

Agar kisi se marasim barhane lagte hain

اگر کسی سے مراسم بڑھانے لگتے ہیں

اگر کسی سے مراسم بڑھانے لگتے ہیں

ترے فراق کے دُکھ یاد آنے لگتے ہیں

ہمیں ستم کا گلہ کیا کہ یہ جہاں والے

کبھی کبھی ترا دل بھی دُکھانے لگتے ہیں

سفینے  چھوڑ کے ساحل چلے تو ہیں لیکن

یہ دیکھنا ہے کہ اب کس ٹھکانے لگتے ہیں

پلک جھپکتے ہی دنیا اُجاڑ دیتی ہے

وہ بستیاں جنھیں بستے زمانے لگتے ہیں

فؔراز ملتے ہیں غم بھی نصیب والوں کو

ہر اک کے ہاتھ کہاں یہ خزانے لگتے ہیں

                     احمد فؔراز

Tum zamana aashna, tum se zamana aashna

تم زمانہ آشنا، تم سے زمانہ آشنا

تم زمانہ آشنا، تم سے زمانہ آشنا

اور ہم اپنے لیے بھی اجنبی ناآشنا

راستے بھر کی رفاقت بھی بہت ہے جانِ من

ورنہ منزل پر پہنچ کر کون کس کا آشنا

اب کے ایسی آندھیاں اُٹھیں کہ سورج بجھ گئے

ہائے وہ شمعیں کہ جھونکوں سے  بھی تھیں ناآشنا

مدّتیں گزریں اِسی بستی میں لیکن اب تلک

لوگ نا واقف، فضا بیگانہ، ہم نا آشنا

ہم بھرے شہروں میں بھی تنہا ہیں جانے کس طرح

لوگ ویرانوں میں کرلیتے ہیں پیدا آشنا

خلق شبنم کے لیے دامن کشا صحراؤں میں

کیا خبر ابرِ کرم ہے صرف دریا آشنا

اپنی بربادی پہ کتنے خوش تھے ہم لیکن فؔراز

دوست دشمن کا نکل آیا ہے اپنا آشنا

                    احمد فرؔاز

Teri batain hi sunane aaye

تیری باتیں ہی سنانے آئے    

تیری باتیں ہی سنانے آئے

دوست بھی دل ہی دکھانے آئے

پھول کھلتے ہیں تو ہم سوچتے ہیں

تیرے آنے کے زمانے آئے

ایسی کچھ چپ سی لگی ہے جیسے

ہم تجھے حال سنانے آئے

عشق تنہا ہے سرِ منزلِ غم

کون یہ بوجھ اٹھانے آئے

اجنبی دوست ہمیں دیکھ کہ ہم

کچھ تجھے یاد دلانے آئے

دل دھڑکتا ہے سفر کے ہنگام

کاش پھر کوئی بلانے آئے

اب تو رونے سے بھی دل دکھتا ہے

شاید اب ہوش ٹھکانے آئے

کیا کہیں پھر کوئی بستی اُجڑی

لوگ کیوں جشن منانے آئے

سو رہو موت کے پہلو میں فؔراز

نیند کس وقت نہ جانے آئے

              احمد فؔراز

Ab is shauq se ke jan se guzar nana chahiye

اب اس  شوق سے کہ جاں سے گزر جانا چاہیے 

اب اس شوق سے کہ جاں سے گزر جانا چاہیے

بول اے ہوائے شہر کدھر جانا چاہیے

کب تک اسی کو آخری منزل کہیں گے ہم

کوئے مراد سے ابھی ادھر جانا چاہیے

وہ وقت آ گیا ہے کہ ساحل کو چھوڑ کر

گہرے سمندروں میں اتر جانا چاہیے

اب رفتگاں کی بات نہیں کارواں کی ہے

جس سمت بھی ہو گردِ سفر جانا چاہیے

کچھ تو ثبوتِ خونِ تمنا کہیں ملے

ہے دل تہی تو آنکھ کو بھر جانا چاہیے

یا اپنی خواہشوں کو مقدس نہ جانتے 

یا خواہشوں کے ساتھ ہی مرجانا چاہیے

                     احمد فؔراز

Tere qareeb aake bari uljhano mein hoon

تیرے قریب  آ کے بڑی الجھنوں میں ہوں

تیرے قریب آ کے بڑی الجھنوں میں ہوں

میں دشمنوں میں ہوں کہ ترے دوستوں میں ہوں

مجھ سے گریز ِ پا ہے تو ہر راستہ بدل !

میں سنگِ راہ ہوں تو سبھی راستوں میں ہوں

تو آ چکا ہے سطح پہ کب سے خبر نہیں

بے درد میں ابھی انہی گہرائیوں میں ہوں

اے یار خوش دیار تجھے کیا خبر کہ میں

کب سے اداسیوں کے گھنے جنگلوں میں ہوں

تو لوُٹ کر بھی اہلِ تمنا کو خوش نہیں

میں لُٹ کے بھی وفا کے انہیں قافلوں میں ہوں

بدلہ نہ میرے بعد بھی موضوعِ گفتگو

میں جا چکا ہوں پھر بھی تری محفلوں میں ہوں

مجھ سے بچھڑ کے تو بھی تو روئے گا عمر بھر

یہ سوچ لے کہ میں بھی ترے خواہشوں میں ہوں

تو ہنس رہا ہے مجھ پہ مرا حال دیکھ کر

اور پھر بھی میں شریک ترے قہقہوں میں ہوں

خود بھی مثالِ لالۂ صحرا لہو لہو

اور خود فؔراز اپنے تماشائیوں میں ہوں

                        احمد فؔراز

Har aashna mein kahan khoo e mehrmana woh

ہر آشنا میں کہاں خوئے محرمانہ وہ

ہر آشنا میں کہاں خوئے محرمانہ وہ

کہ بے وفا تھا مگر دوست تھا پرانا وہ

کہاں سے لائیں اب آنکھیں اسے کہ رکھتا تھا

عداوتوں میں بھی انداز مخلصانہ وہ

جو ابر تھا تو اسے ٹوٹ کر برسنا تھا 

یہ کیا کہ آگ لگا کر ہوا روانہ وہ

پکارتے ہیں مہ و سال منزلوں کی طرح

لگا ہے توسنِ ہستی کو تازیانہ وہ

ہمیں بھی  غم طلبی کا  نہیں رہا یارا

ترے بھی رنگ نہیں گردشِ زمانہ وہ

اب اپنی خواہشیں کیا کیا اسے رلاتی ہیں

یہ بات ہم نے کہی تھی مگر نہ مانا وہ

یہی کہیں گے کہ بس صورت آشنائی تھی

جو عہد ٹوٹ گیا یاد کیا دلانا وہ

اس ایک شکل میں کیا کیا نہ صورتیں دیکھیں

نگار تھا نظر آیا نگار خانہ وہ

فؔراز خواب سی غفلت دکھائی دیتی ہے

جو لوگ جانِ جہاں تھے ہوئے فسانہ وہ

             احمد فؔراز

Kab ham ne kaha tha hamain dastar o qaba do

کب ہم نے کہا تھا ہمیں دستار و قبا دو

کب ہم نے کہا تھا ہمیں دستار و قبا دو

ہم لوگ نوا گر  ہیں ہمیں اِذنِ نوا دو

ہم آئینے لائے ہیں سرِ کوُئے رقیباں

اے سنگ فروشو یہی الزام لگا دو

لگتا ہے کہ میلہ سا لگا ہے سرِمقتل

اے دل زدگاں بازوئے قاتل کو دعا دو

ہے بادہ گساروں کو تو میخانے  سے نسبت

تم مسندِ ساقی پہ کسی کو بھی بٹھادو

میں شب کا بھی مجرم تھا سحر کا بھی گنہگار

لوگو مجھے اس شہر کے آداب سکھا دو

           احمد فرازؔ

Ye main bhi kya hoon use bhool kar usi ka raha

یہ میں بھی کیا ہوں اسے بھول کر اسی کا رہا

یہ میں بھی کیا ہوں اسے بھول کر اسی کا رہا

کہ جس کے ساتھ نہ تھا ہمسفر اسی کا رہا

وہ بت کہ دشمنِ دیں تھا بقول ناصح کے

سوالِ سجدہ جب آیا تو در اسی کا رہا

ہزار چارہ گروں مے ہزار باتیں کیں

کہا جو دل مے سخن معتبر اسی کا رہا

بہت سی خواہشیں  سو بارشوں میں بھیگی ہیں

میں کس طرح سے کہوں عمر بھر اسی کا رہا

کہ اپنے حرف کی توقیر جانتا تھا فرازؔ

اسی لئے کفِ قاتل پہ سر اسی کا رہا

                    احمد فرازؔ

Le uda phir koi khayal hamein

لے اُڑا پھر کوئی خیال ہمیں

لے اُڑا پھر کوئی خیال ہمیں

ساقیا ساقیا سنبھال ہمیں

رو رہے ہیں کہ ایک عادت ہے

ورنہ اتنا نہیں ملال ہمیں

خلوتی ہیں ترے جمال کے ہم

آئینے کی طرح سنبھال ہمیں

مرگِ انبوہ ، جشنِ شادی ہے

مل گئے دوست حسبِ حال ہمیں

اختلافِ جہاں کا رنج نہ تھا

دے گئے مات ہم خیال ہمیں

کیا توقع کریں زمانے سے

ہو بھی گر جُرأتِ سوال ہمیں

ہم یہاں بھی نہیں ہیں خوش لیکن

اپنی محفل سے مت نکال ہمیں

ہم ترے دوست ہیں فؔراز مگر

اب نہ اور اُلجھنوں میں ڈال ہمیں

             احمد فؔراز

Ajeeb rut thi ke har chand pas tha wo bhi

عجیب رت تھی کہ ہر چند پاس تھا وہ بھی

عجیب رت تھی کہ ہر چند پاس تھا وہ بھی

بہت ملول تھا میں بھی ،   اداس تھا وہ بھی

کسی کے شہر میں کی گفتگو ہواؤں سے

یہ سوچ کر کہ کہیں آس پاس تھا وہ بھی

ہم اپنے زعم میں خوش تھے کہ اس کو بھول چکے

مگر گمان تھا یہ بھی ، قیاس تھا وہ بھی

کہاں ہے اب غم دنیا کہاں ہے اب غم جاں

وہ دن بھی تھے کہ ہمیں یہ بھی راس تھا وہ بھی

فرازؔ تیرے گریباں پہ کل جو ہنستا تھا 

اسے ملے تو دریدہ لباس تھا وہ بھی

                     احمد فرازؔ