Ajab apna haal hota jo wisaal e yaar hota

عجب اپنا حال ہوتا جو وصالِ یار ہوتا

عجب اپنا حال ہوتا جو وصالِ یار ہوتا

کبھی جان صدقے ہوتی کبھی دل نثار ہوتا

کوئی فتنہ تا قیامت نہ پھر آشکار ہوتا

ترے دل پہ کاش ظالم مجھے اختیار ہوتا

جو تمہاری طرح تم سے کوئی جھوٹے وعدے کرتا

تمہیں منصفی سے کہدو تمہیں اعتبار ہوتا

یہ مزا تھا دل لگی کا کہ برابر آگ لگتی

نہ تجھے قرار ہوتا نہ مجھے قرار ہوتا

نہ مزا ہے دشمنی میں نہ ہے لطف دوستی میں

کوئی غیر غیر ہوتا ،  کوئی  یار یار ہوتا

ترے وعدے پہ ستمگر ابھی اور صبر کرتے

اگر اپنی زندگی کا ہمیں اعتبار ہوتا

تمہیں ناز ہو نہ کیونکر کہ لیا ہے داؔغ کا دل

یہ رقم نہ ہاتھ لگتی نہ یہ افتخار ہوتا

             نواب مرزا خان داؔغ دہلوی

                     

Khatir se ya lihaz se main man to gaya

خاطر سے یا لحاظ سے میں مان تو گیا

خاطر سے یا لحاظ سے میں مان تو گیا

جھوٹی قسم سے آپ کا ایمان تو گیا

دل لے کے مفت کہتے ہیں کچھ کام کا نہیں

الٹی شکائتیں ہوئیں احسان تو گیا

ڈرتا ہوں دیکھ کر دلِ بے آرزو کو میں

سنسان گھر یہ کیوں نہ ہو مہمان تو گیا

افشائے رازِ عشق میں گو ذلتیں ہوئیں

لیکن اسے جتا تو دیا جان تو گیا

گو نامہ بر سے خوش نہ ہوا پر ہزار شکر

مجکو  وہ میرے نام سے پہچان تو گیا

بزمِ عدو میں صورتِ پروانہ دل مرا

گو رشک سے جلا ترے قربان تو گیا

ہوش و حواس و تاب و تواں داؔغ جا چکے

اب ہم بھی جانے والے ہیں سامان تو گیا

          نواب مرزا خان داؔغ دہلوی

Mere qabu mein na pehron dil e nashad aaya

مرے قابو میں نہ پہروں دلِ ناشاد آیا

مرے قابو میں نہ پہروں دلِ ناشاد آیا

وہ مرا بھولنے والا جو مجھے یاد آیا

کوئی بھولا ہوا اندازِ ستم یاد آیا

کہ تبسم تجھے ظالم دمِ بیداد آیا

چین کرتے ہیں وہاں رنج اُٹھانے والے

کام عقبیٰ میں ہمارا دلِ ناشاد  آیا

دی موذّن نے شبِ وصل اذاں پچھلی رات

ہائے کمبخت کو کس وقت خدا یاد آیا

لیجئے سنیئے اب افسانۂ فرقت مجھ سے

آپ نے یاد دلایا تو مجھے یاد آیا

آپ کی بزم میں سب کچھ ہے مگر داؔغ نہیں

ہم کو وہ خانہ خراب آج بہت یاد آیا

               نواب مرزا خان داؔغ دہلوی

Sabab khula ye hamein un ke munh chupane ka

Kabhi tarpa ke dil pe hath rakhna

Mujhy kosain bala ke galyan dain