Dil ghani hai dua se kya lena

دل غنی ہے دعا سے کیا  لینا

دل غنی ہے دعا سے کیا  لینا

بے ضرورت خدا  سے کیا  لینا

اپنی مرضی سے کچھ عطا   فرما

ہم کو اپنی رضا سے  کیا   لینا

 دردِ سر کا علاج پتھر  ہے

ہوشمندو ! صبا سے کیا لینا

لذّتِ درد ، ایک چیز تو ہے

درد والو ! دوا سے کیا  لینا

دانشِ راہزن سے کچھ مانگو

حکمتِ رہنما سے کیا لینا

آپ کا جور بھی غنیمت ہے

آپ کو اعتنا سے کیا لینا

مدّعا کے لیے سخن ، ہے ہے

خامشی کو صدا سے کیا لینا

بلبلے کی فنا ، نشاطِ ابد

زندگی کو بقا سے کیا لینا

ہم کو تیری جفا سے کیا نہ ملا

ہم کو تیری وفا سے کیا لینا

ہم فقیروں کی مشت میں سلطاں

ہم کو بالِ ہما سے کیا لینا

بت پرستی ہے نقد کا سودا

چھپنے والے خدا سے کیا لینا

اب سرِ شوق ہی نہیں باقی

اب ترے نقشِ پا سے کیا لینا

اے شہِ وقت ! اپنا رزق سنبھال

تجھ کو رزقِ گدا سے کیا لینا

مل گیا جو ازل میں ملنا تھا

اے عدؔم ماسوا سے کیا لینا

         عبدالحمید عدمؔ

Hum kuch is dhab se tere ghar ka pata dete hain

ہم کچھ اس ڈھب سے ترے گھر کا پتہ دیتے ہیں

ہم کچھ اس ڈھب سے ترے گھر کا پتہ دیتے ہیں

خضر بھی آئے تو گمراہ  بنا دیتے ہیں

کس قدر محسن و ہمدرد ہیں احباب مرے

جب بھی میں ہوش میں آتا ہوں پلا دیتے ہیں

شکر ہے فکر سے تو نے ہمیں آزاد کیا

راہ زن تیری بصیرت کو دعا دیتے ہیں

عقل ہر شخص کو اتنی کہاں ہوتی ہے نصیب

وہ تو کچھ سر پھرے انسان سکھا دیتے ہیں

ہم کریں گے بھی تو  رکھوالی کہاں تک اسکی

آج دل کو تری زلفوں میں بسا دیتے ہیں

حادثہ کوئی خدا  نے بھی کیا ہے پیدا

حادثے تو فقط انسان بنا   دیتے ہیں

یاد  بچھڑے ہوئے ایّام کی یوں آتی ہے

جس طرح  دور سے معشوق صدا دیتے ہیں

ہم کو شاہوں سے عدالت کی توقع تو نہیں

آپ کہتے ہیں تو زنجیر ہلا دیتے ہیں

دل اسی زہر کی لذّت سے سلامت ہے عدمؔ

ہم حسینوں کی جفاؤں کو دعا  دیتے ہیں

             عبدالحمید عدمؔ

Khuloos e ishaq ka iqrar farma

خلوصِ عشق کا اقرار فرما

خلوصِ عشق کا اقرار فرما

ہمیں بھی سرفرازِ دار  فرما

ہمیں پینے کی عادت پڑگئی ہے

نگاہِ مست سے سرشار فرما

جوانی پر بھی لازم ہے عبادت

طوافِ کوچۂ   دلدار  فرما

مجھے ہر چیز حاصل ہوگئی ہے

تو پھر اک مرتبہ انکار فرما

مجھ جھک کر نہ مل محشر میں زاہد

مجھے اتنا   نہ  زیرِ بار  فرما

عدؔم واقف ہے تو موسم کی ضد سے

پیالہ تھام  ، اور اشعار فرما

       عبدالحمید عدمؔ

Mozoon hai intekhab e khirad jam khoob hain

موزوں ہے انتخابِ خرد ، جام خوب ہیں   

موزوں ہے انتخابِ خرد ، جام خوب ہیں

آغاز   دلفریب ہیں ، انجام    خوب ہیں

ممکن ہے اور شےبھی ہو ایسی حسیں کوئی

نادانئ    شباب   کے   ایام   خوب   ہیں

سادہ محبّتوں کی   یہ   بے لوث   تہمتیں

تسنیم میں دھلے   ہوئے   الزام خوب ہیں

کیوں رو رہا ہے پی کے پیالہ شراب کا

زاہد ثواب و خیر کے سب کام خوب ہیں

جی چاہتا ہےدل تری  زلفوں کو سونپ دوں

یہ الجھنیں عجیب ہیں یہ دام خوب ہیں

کیا نیک نامیوں کی خلش میں پڑیں عدؔم

رسوا بہت درست ہیں بدنام خوب ہیں

                عبدالحمید عؔدم

Aik unwan ka tajassus hai

ایک عنواں کا تجسس ہے کہانی کیلئے

ایک عنواں کا تجسس ہے کہانی کیلئے

ایک صدمے کی ضرورت ہے جوانی کیلئے

ایک تیر، ایک کسک، ایک ادا، ایک نظر

دل ہے مشتاق محبت کی نشانی کیلئے

پہلی تقصیر  ہی تا دار و رسن لے پہنچی

حوصلہ  کون  کرے  لغزشِ ثانی  کیلئے

عشق بیمار ہے، مجروح ہے، آزردہ ہے

عقل رخصت ہے سوئے میکدہ پانی کیلئے

مَے کے بارے میں عدمؔ اتنی خبر ہے ہم کو

چیز اچھی ہے طبیعت کی روانی کیلئے

                           عبدالحمید عدمؔ

Hans hans ke jhoom jhoom ke la

ہنس ہنس جھوم جھوم کے لا، مسکرا کے لا

ہنس ہنس جھوم جھوم کے لا، مسکرا کے لا

پھولوں کےرس میں چاند کی کرنیں ملا لے لا

محسوس ہورہا   ہے   ستارے علیل   ہیں

ان کو بھی چند گھونٹ کہیں سے پلا کے لا

کیوں جارہی ہے روٹھ   کر  دوشیزۂ   بہار 

اس گلبدن  کو  روک ،  اسے  ورغلا  کے لا

کہتے ہیں عمرِ رفتہ   کبھی   لوٹتی   نہیں

جا  میکدے  سے  میری  جوانی اُٹھا  کے لا

میں تو فریب کھانے کا عادی ہوں اے اُمید

جا اب   کوئی   جدید  کھلونا   بنا    کے لا

دیکھی نہیں ہے تو نے کبھی زندگی کی لہر

اچھا تو جا   عدمؔ کی صراحی  اُٹھا  کے لا

                         عبدالحمید عدمؔ

Bahar e umer ary ks qadar

بہارِ عمر! ارے کس قدر شتاب چلی

بہارِ عمر! ارے کس قدر شتاب چلی

بتا تو کچھ، تو کہاں خانماں خراب چلی

فقیہہ و رند تھے دونوں کچھ ایسے شُستہ مزاج

کہ ان کے بیچ چلی تو فقط شراب چلی

خزاں نے ڈھانپ دیئے رُخ تمام پھولوں کے

صبا جو سوئے چمن بہرِ انتخاب چلی

وہ گھر سے نکلے سحر دم جو آنکھ ملتے ہوئے

تو ٹھیک ہو کے ذرا نبضِ آفتاب چلی

ہوئی روانہ تو ایسے ہوئی جراحتِ ہوش

کہ جیسے کوئی دُعا ہوکے مستجاب چلی

مرے فسانے کا جب آخری ورق آیا

کسی کے سہمے ہوئے ہاتھ سے کتاب چلی

یہاں جو سادہ سی صورت عدمؔ نطر آئی

چلی تو لُوٹ کے آنکھوں کی آب و تاب چلی

                         عبدلحمید عدمؔ

Zulfe barham sambhal kar

زلفِ برہم سنبھال کر چلئے

زلفِ برہم سنبھال کر چلئے

راستہ دیکھ بھال کر چلئے

موسمِ گل ہے اپنی بانہوں کو

میری بانہوں میں ڈال کر چلئے

میکدے میں نہ بیٹھئے، تاہم

کچھ طبیعت بحال کر چلئے

کچھ نہ دیں گے تو کیا زیاں ہوگا

حرج کیا ہے سوال کر چلئے

ہے اگر قتلِ عام کی نیت

جسم کی چھب نکال کر چلئے

کسی نازک بدن سے ٹکرا کر

کوئی کسبِ کمال کر چلئے

یا دوپٹہ نہ لیجئے سر پر

یا دوپٹہ سنبھال کر چلئے

یار دوزخ میں ہیں مقیم عدمؔ

خلد سے انتقال کر چلئے

             عبدالحمید عدمؔ

Girte hain log

گرتے ہیں لوگ، گرمئ بازار دیکھ کر

گرتے   ہیں  لوگ ،  گرمئ  بازار  دیکھ  کر

سرکار  دیکھ   کر ،  میری سرکار دیکھ  کر

آوارگی   کا   شوق  بھڑکتا   ہے   اور بھی

تیری    گلی    کا  سایہ      دیوار  دیکھ  کر

تسکینِ  دل   کی  ایک  ہی  تدبیر   ہے  فقط

سر   پھوڑ  لیجئے  کوئی   دیوار  دیکھ  کر

ہم بھی گئے ہیں ہوش سے ساقی کبھی کبھی

لیکن  تری  نگاہ    کے   اطوار   دیکھ   کر

کیا  مستقل   علاج  کیا   دل   کے درد   کا

وہ  مسکرا  دیئے مجھے   بیمار  دیکھ   کر

دیکھا   کسی  کی سمت  تو  کیا   ہوگیا عدمؔ

چلتے  ہیں   راہ   رَو   سرِ بازار دیکھ   کر

                     عبدالحمید عدمؔ

Us ki payal agar chhanak jaye