Agar kisi se marasim barhane lagte hain

اگر کسی سے مراسم بڑھانے لگتے ہیں

اگر کسی سے مراسم بڑھانے لگتے ہیں

ترے فراق کے دُکھ یاد آنے لگتے ہیں

ہمیں ستم کا گلہ کیا کہ یہ جہاں والے

کبھی کبھی ترا دل بھی دُکھانے لگتے ہیں

سفینے  چھوڑ کے ساحل چلے تو ہیں لیکن

یہ دیکھنا ہے کہ اب کس ٹھکانے لگتے ہیں

پلک جھپکتے ہی دنیا اُجاڑ دیتی ہے

وہ بستیاں جنھیں بستے زمانے لگتے ہیں

فؔراز ملتے ہیں غم بھی نصیب والوں کو

ہر اک کے ہاتھ کہاں یہ خزانے لگتے ہیں

                     احمد فؔراز