Har aashna mein kahan khoo e mehrmana woh

ہر آشنا میں کہاں خوئے محرمانہ وہ

ہر آشنا میں کہاں خوئے محرمانہ وہ

کہ بے وفا تھا مگر دوست تھا پرانا وہ

کہاں سے لائیں اب آنکھیں اسے کہ رکھتا تھا

عداوتوں میں بھی انداز مخلصانہ وہ

جو ابر تھا تو اسے ٹوٹ کر برسنا تھا 

یہ کیا کہ آگ لگا کر ہوا روانہ وہ

پکارتے ہیں مہ و سال منزلوں کی طرح

لگا ہے توسنِ ہستی کو تازیانہ وہ

ہمیں بھی  غم طلبی کا  نہیں رہا یارا

ترے بھی رنگ نہیں گردشِ زمانہ وہ

اب اپنی خواہشیں کیا کیا اسے رلاتی ہیں

یہ بات ہم نے کہی تھی مگر نہ مانا وہ

یہی کہیں گے کہ بس صورت آشنائی تھی

جو عہد ٹوٹ گیا یاد کیا دلانا وہ

اس ایک شکل میں کیا کیا نہ صورتیں دیکھیں

نگار تھا نظر آیا نگار خانہ وہ

فؔراز خواب سی غفلت دکھائی دیتی ہے

جو لوگ جانِ جہاں تھے ہوئے فسانہ وہ

             احمد فؔراز