Dunya ka kuch bura bhi tamasha nahin raha

دنیا کا کچھ بُرا بھی تماشہ نہیں رہا

دنیا کا کچھ بُرا بھی تماشہ نہیں رہا

دل چاہتا تھا جس طرح ویسا نہیں رہا

تم سے ملے بھی ہم تو جُدائی کے موڑ پر

کشتی ہوئی نصیب تو دریا نہیں رہا

کہتے تھے ایک پل نہ جئیں گے تیرے بغیر

ہم دونوں رہ گئے ہیں وہ وعدہ نہیں رہا

کاٹے ہیں اِس طرح  سے تیرے بعد روز و شب

میں سانس لے رہا تھا پر زندہ نہیں رہا

آنکھیں بھی دیکھ دیکھ کے خواب آگئی ہیں تنگ

دل میں بھی اب وہ شوق وہ لپکا نہیں رہا

کیسے ملائیں آنکھ کسی آئینے سے ہم

اؔمجد ہمارے پاس تو چہرہ نہیں رہا

              امجد اسلام اؔمجد