Aawargi barangge tamasha

آوارگی برنگ ِ تماشا بُری نہیں

آوارگی برنگِ تماشا بُری نہیں

ذوقِ نظر ملے تو یہ دنیا بُری نہیں

کہتے ہیں تیری زُلف ِ پریشاں کو زندگی

اے دوست! زندگی کی تمنّا بُری نہیں

ہے ناخُدا کا میری تباہی سے واسطہ

میں جانتا ہوں نیّتِ دریا بُری نہیں

ذوقِ جنوں کے ساتھ ہے بیدارئ خرد

شبنم کے ساتھ گرمئ شعلہ بُری نہیں

اِس رہزنِ حیات زمانے سے دُور چل

مر بھی گئے تو چادرِصحرا بُری نہیں

ساؔغر کے ساتھ چل کےکبھی میکدے میں سُن

اتنی حدیثِ بادہ  و  صہبا بُری نہیں

              ساؔغر صدیقی