Kya farq dagh o gul mein agar gul mein boo na ho

کیا فرق داغ و گل میں ، اگر گل میں بو نہ ہو

کیا فرق داغ و گل میں ، اگر گل میں بو نہ ہو

کس کام کا وہ دل ہے کہ جس دل میں تو نہ ہو

ہووے نہ حول و قوت اگر تیری درمیاں

جو ہم سے ہوسکے ہے ، سو ہم سے کبھو نہ ہو

جو کچھ کہ ہم نے کی ہے تمنّا ، ملی  ، مگر

یہ آرزو رہی ہے کہ کچھ آرزو نہ ہو

جوں شمع جمع ہوویں گر اہل  زباں ہزار

آپس میں چاہیے کہ کبھو گفتگو نہ ہو

جوں صبح ، چاکِ سینہ مرا ، اے رفو گراں

یاں تو کسو کے ہاتھ سے ہرگز رفو نہ ہو

اے درؔد ! زنگِ صورت اگر اس میں جا کرے

اہلِ صفا میں آئنۂ دل کو رُو نہ ہو

                  خواجہ میر درؔد دہلوی