Sitam gari ka har andaz

ستم گری کا ہر انداز محرمانہ لگا

ستم گری کا ہر انداز محرمانہ لگا

میں کیا کروں مرا دشمن مجھے بُرا نہ لگا

ہر اک کو زعم تھا کس کس کو ناخدا کہتے

بھلا ہوا کہ سفینہ کنارے جا نہ لگا

مرےسخن کا قرینہ ڈبو گیا مجھ کو

کہ جس کو حال سُنایا اُسے فسانہ لگا

برونِ در نہ کوئی روشنی نہ سایہ تھا 

سبھی فسانہ مجھے اندرونِ خانہ لگا

میں تھک گیا تھا بہت پے بہ پے اُڑانوں سے

جبھی تو دام بھی اس بار آشیانہ لگا

اس عہدِ ظلم میں مَیں بھی شریک ہوں جیسے

مرا سکوت مجھے سخت مجرمانہ لگا

وہ لاکھ زود فراموش ہو فرازؔ مگر

اسے بھی مجھ کو بھلانے میں اک زمانہ لگا

                         احمد فرازؔ