Tabay muztar sambhal na jay kahin

طبع مضطر سنبھل نہ جائے کہیں

طبع مضطر سنبھل نہ جائے کہیں

دل میں یہ درد پل نہ جائے کہیں

آج دنیا میں ہے بڑی ہل چل

خوابِ ہستی کچل نہ جائے کہیں

غنچے غنچےکا پیرہن دمِ صبح

سو جگہ سے نکل نہ جائے کہیں

آج آثار دردِ دل ہیں کچھ اور

رات فرقت کی ڈھل نہ جائے کہیں

گھر کو گھر کا چراغ پھونک نہ دے

گل سے گلزار جل نہ جائے کہیں

خوب نبھتی ہے دل میں اور مجھ میں

ڈر ہے آپس میں چل نہ جائے کہیں

تیز گردش سے ڈر ہے دورِ حیات

اپنے محور سے ٹل نہ جائے کہیں

کشتۂ   ہجرِ   زندگی   پہ   فراؔق

موت بھی ہاتھ مل نہ جائے کہیں

         فراق گورکھپوری