2016-04-12

Abr e bahar ab ke bhi barsa parey parey

ابرِبہار  اب کے بھی برسا پرے پرے

ابرِ بہار اب کے بھی برسا پرے پرے
گلشن اُجاڑ اُجاڑ ہیں جنگل ہرے ہرے
جانے یہ تشنگی ہے ہوس ہے کہ خودکشی
جلتے ہیں شام ہی سے جو ساغر بھرے بھرے
ہے دل کی موت عہدِ وفا کی شکستگی
پھر بھی جو کوئی ترکِ محبت کرے کرے
اب اپنا دل بھی شہرِ خموشاں سے کم نہیں
سُن ہوگئے ہیں کان صدا پر دھرے دھرے
رہتے ہیں اہلِ شہر کے سائے سے دور دور
ہم آہوانِ دشت کی صورت ڈرے ڈرے
گل بن کے پھوٹتا ہے لہو شاخسار سے
زخم ِ رگِ بہار ہیں پتے ہرے ہرے
زندہ دلانِ شہر کو کیا ہوگیا  فراؔز
آنکھیں بجھی بجھی ہیں تو چہرے مرے مرے
                         احمد فراؔز

No comments:

Post a Comment