Yun to pehle bhi hue us se kai bar juda

یوں تو پہلے بھی ہوئے اس سے کئی  بار جُدا

یوں تو پہلے بھی ہوئے اس سے کئی بار جدا

لیکن اب کے نظر آتے ہیں کچھ آثار  جدا

گر غمِ سود و زیاں ہے تو ٹھہر جا اے جاں

کہ اسی موڑ پہ یاروں سے ہوئے یار جدا

دو گھڑی اُس سے رہو دور تو یوں لگتا ہے

جس طرح سایۂ دیوار سے دیوار  جدا

یہ جدائی کی گھڑی ہے کہ جھڑی ساون کی

میں جدا گریۂ کناں، ابر جدا ،یار جدا

کجکلاہوں سے کہے کون کہ اے بے خبرو!

طوقِ گردن سے نہیں طرّۂ دستار  جدا

کوئے جاناںمیں بھی خاصا تھا طرحدار فرؔاز

لیکن اس شخص کی سج دھج تھی سرِدار جدا

                 احمد فرؔاز