Kya batain fasle bekhawabi yahan

کیا بتائیں فصلِ بے خوابی یہاں بوتا ہے کون

کیا بتائیں فصلِ بے خوابی یہاں بوتا ہے کون

جب درودیوار جلتے ہوں تو پھر سوتا ہے کون

تم تو کہتے تھے کہ سب قیدی رہائی پا گئے

پھر پسِ دیوار زنداں رات بھر روتا ہے کون

بس تری بے چارگی ہم سے نہیں دیکھی گئی

ورنہ ہاتھ آئی ہوئی دولت کو یوں کھوتا ہے کون

کون یہ پاتال سے لے کر ابھرتا ہے مجھے

اتنی تہہ داری سے مجھ پر منکشف ہوتا ہے کون

کوئی  بے ترتیبئ  کردار  کی  حد  ہے سلیمؔ

داستاں کس کی ہے زیبِ داستاں ہوتا ہے کون

                       سلیم کوؔثر