Inhin khush gumanion main

انھیں خوش گمانیوں میں کہیں جاں سے ہی نہ جاؤ

انھیں خوش گمانیوں میں کہیں جاں سے ہی نہ جاؤ

وہ  جو  چارہ گر  نہیں  ہے  اسے  زخم  کیوں  دکھاؤ

یہ اُداسیوں کے موسم  یونہی  رائیگاں  نہ  جائیں

کسی  یاد  کو   پکارو   کسی  درد  کو   جگاؤ

وہ کہانیاں  ادھوری  جو  نہ  ہوسکیں  گی   پوری

انھیں میں بھی کیوں سناؤں ،انھیں تم بھی کیوں سناؤ

یہ جدائیوں کے رستے بڑی دور تک گئے ہیں

جو  گیا  وہ  پھر نہ   آیا  مری بات  مان  جاؤ

کسی  بے وفا  کی  خاطر  یہ جنوں فرؔاز کب تک

جو تمھیں بھلا  چکا  ہے  اسے تم بھی بھول  جاؤ

                         احمد فؔراز