Hont heeron se na chehra hai sitare ki misal

ہونٹ ہیروں سے نہ چہرہ ہے ستارے کی مثال

ہونٹ ہیروں سے نہ چہرہ ہے ستارے کی مثال

پھر بھی لائے تو کوئی دوست ہمارے کی مثال

زندگی اوڑھ کے بیٹھی تھی گھٹا ٹوپ ردا

ہم نے غم ٹانک دیا تیرا ستارے کی مثال

عشق کو بھی تو ہوس پیشہ تجارت جانیں

وصل ہے نفع تو ہجراں ہے خسارے کی مثال

ہم کبھی ٹوٹ کے روئے نہ کبھی کھل کے ہنسے

رات شبنم کی طرح صبح ستارے کی مثال

مجھ سے کیا ڈوبنے والوں کا پتہ پوچھتے ہو

میں سمندر کا حوالہ نہ کنارے کی مثال

ناسپاسی کی  بھی حد ہےجو یہ کہتے ہو فؔراز

زندگی ہم نے گزاری ہےگزارے کی مثال

                             احمد فؔراز