Apni hi taigh e ada se aap ghayal hogya

اپنی ہی تیغِ ادا سے آپ گھائل ہوگیا

اپنی ہی تیغِ ادا سے آپ گھائل ہوگیا

چاند نے پانی میں دیکھا اور پاگل ہوگیا

وہ ہوا تھی شام ہی سے رستے خالی ہوگئے

وہ گھٹا برسی کہ سارہ شہر جل تھل ہوگیا

میں اکیلا اور سفر کی شام رنگوں میں ڈھلی

پھر یہ منظر میری نظروں سے بھی اوجھل ہوگیا

اب کہاں ہوگا وہ اور ہوگا بھی تو ویسا کہاں

سوچ کر یہ بات جی  کچھ اور بوجھل ہوگیا

حسن کی دہشت عجب تھی وصل کی شب میں منؔیر

ہاتھ جیسے انتہائے شوق سے شل ہوگیا

                        منؔیر نیازی