Aik sa apne prai pe karam hai us ka

ایک سا اپنے پرائے پہ کرم ہے اس کا

ایک سا اپنے پرائے پہ کرم ہے اس کا

بس یہی اہل ِ محبت پہ ستم ہے اس کا

لاجونتی کی طرح جو میرے دل میں اُتری

مجھ سے شرمانے کو شاید یہ جنم ہے اس کا

وہ پجاری کہ نہ دل جس کا لگے پوجا میں

ایسا لگتا ہے کوئی اور صنم ہے اس کا

مرد کے ساتھ کی ملزم ہے جو بےبس عورت

اس پہ کیا گزرے گی یارو مجھے غم ہے اس کا

مجھ سے مفلس کا بھی جب حال کوئی پوچھتا ہے

میں یہ کہتا ہوں بڑا مجھ پہ کرم ہے اس کا

اس کی مرضی کہ جہاں چاہے کرائے سجدہ

مسجدیں اس کی ہیں، دیر اسکا، حرم ہے اس کا

وہ جو لکھواتا ہےبس میں وہ لکھے جاتا ہوں

ہاتھ بیشک میرا اپنا ہے ، قلم ہے اس کا

سب خلاؤں کے مسافر یہ گواہی دیں گے

جو ستارہ ہے ، وہ اک نقشِ قدم ہے اس کا

مشترک دردِ محبت اسے کہتے ہیں قتؔیل 

اشک میرے ہیں مگر دیدۂ نم ہے اس کا

         قتیل شفائی